Mat 13 | NdeIBE | STEP | Ngalonalolosuku uJesu waphuma endlini wayahlala eceleni kwechibi.

Matthew 13

Umzekeliso Womhlanyeli

1 Ngalonalolosuku uJesu waphuma endlini wayahlala eceleni kwechibi.

2 Amaxuku abantu aminyezelana kuye waze wangena esikepeni wahlala kuso, abantu bonke bona bemi okhunjini.

3 Wasebatshela izinto ezinengi esebenzisa imizekeliso, wathi, “Umlimi waphuma wayahlanyela inhlanyelo yakhe. 4 Kwathi elokhu eyihaza inhlanyelo, enye yawela endleleni, izinyoni zafika zayidobha. 5 Enye yawela ekhetheni lapho eyayingelawo umhlabathi owaneleyo. Yaphanga yamila ngokuba umhlabathi wawungatshoni. 6 Kodwa kwathi ilanga seliphumile yahanguleka yabuna ngokuba yayingelampande. 7 Enye inhlanyelo yawela phakathi kwameva, asuka akhula ayiminyanisa inhlanyelo. 8 Kwathi enye inhlanyelo yawela emhlabathini omuhle lapho eyabeka khona izithelo – yeva ngekhulu, ngamatshumi ayisithupha loba ngamatshumi amathathu ukudlula leyo eyayihlanyelwe.

9 Lowo olendlebe kezwe.”

10 Abafundi beza kuye bambuza bathi, “Kungani ukhuluma ebantwini ngemizekeliso na?”

11 Waphendula wathi, “Ulwazi lwemfihlakalo yombuso wezulu luphiwe lina, kodwa hatshi bona. 12 Lowo olakho uzaphiwa kwengezelelwe, ngakho uzakuba lokunengi kakhulu. Lowo ongelakho, lalokho alakho uzakwemukwa.

13 Yikho ngikhuluma kubo ngemizekeliso: “Loba bekhangele kababoni; loba belalele kabezwa, kabaqedisisi.

14 Kubo kuyagcwaliseka isiphrofetho sika Isaya: “ ‘Lizahlala lisizwa kodwa lingaqedisisi; lizahlala libona kodwa kungagxili ezingqondweni.

15 Ngokuba inhliziyo yalaba bantu seyaba lukhuni; kabasezwa ngezindlebe zabo, njalo sebawavala amehlo abo. Funa babone ngamehlo abo, bezwe ngezindlebe zabo, baqedisise ngezinhliziyo zabo baphenduke bese ngibasilisa.’

16 Kodwa abusisiwe amehlo enu ngokuba ayabona, lezindlebe zenu ngokuba ziyezwa.

17 Ngokuba ngilitshela iqiniso ukuthi abaphrofethi abanengi lamadoda ayelungile balangazela ukukubona lokhu elikubonayo kodwa kabakubonanga, lokuzwa lokhu elikuzwayo kodwa kabakuzwanga.

18 “Lalelani-ke lizwe ukuthi utshoni umzekeliso womhlanyeli: 19 Nxa umuntu esizwa ilizwi ngombuso kodwa engabambisisi, omubi uyeza ahwithe lokho obekuhlanyelwe enhliziyweni. Yiyole inhlanyelo eyahlanyelwa endleleni. 20 Lowo owemukela inhlanyelo eyawela ekhetheni ngumuntu olizwayo ilizwi aphange alamukele ngentokozo. 21 Kodwa ngenxa yokuthi kalampande, uma okwesikhatshana kuphela. Nxa kufika uhlupho lokuhlukunyezwa ngenxa yelizwi uphanga akhubeke. 22 Lowo owemukela inhlanyelo eyawela emeveni ngumuntu olizwayo ilizwi, kodwa lisuke landelwe yizinhlupheko zale impilo lenkohliso yenotho, lingabe lisaba lezithelo. 23 Kodwa lowo owemukela inhlanyelo eyawela emhlabathini olungileyo ngumuntu olizwayo ilizwi alibambisise. Uthela amabele andayo ngekhulu, ngamatshumi ayisithupha loba ngamatshumi amathathu okudlula lokho okwahlanyelwayo.”

Umzekeliso Wokhula

24 UJesu wabatshela omunye umzekeliso: “Umbuso wezulu unjengomuntu owahlanyela inhlanyelo enhle ensimini yakhe. 25 Kodwa kwathi ngesikhathi wonke umuntu elele, isitha sakhe seza sahlanyela ukhula phakathi kwengqoloyi, sahamba. 26 Kwathi ingqoloyi isikhahlele yabumba amazimba ukhula lalo lwavela.

27 “Izisebenzi zomnininsimu zeza kuye zathi, ‘Mnumzana, kanti kawuhlanyelanga yini imbewu elungileyo ensimini yakho na? Pho ukhula luvele ngaphi?’

28 “Waphendula wathi, ‘Kwenziwe yisitha lokhu.’ Zambuza izisebenzi zathi, ‘Uyafuna yini ukuthi siyelusiphuna na?’

29 “ ‘Waphendula wathi, ‘Hatshi, ngokuba lizakuthi lisiphuna ukhula liqabuke selisiphuna amabele kanye lalo. 30 Kuyekeleni kukhule ndawonye kuze kube yisikhathi sokuvuna. Lapho-ke ngizakuthi kubavuni: Qalani ngokuqoqa ukhula lilubophe izinyanda ukuba lutshiswe; libe seliqoqa amabele liwalethe esiphaleni.’ ”

Umzekeliso Wentanga Yemastadi Lemvubelo

31 Wabatshela omunye umzekeliso wathi: “Umbuso wezulu ufana lenhlamvuyemastadi eyathathwa ngenye indoda yayihlanyela ensimini yayo. 32 Lokuba incinyane kulazo zonke izinhlamvu elilazo, kodwa ithi ingakhula iba yisihlahla esikhulu kulazo zonke zesivande, zize izinyoni zezulu zikhusele ezingatsheni zaso.”

33 Waphinda wabatshela omunye umzekeliso wathi, “Umbuso wezulu ufana lemvubelo owesifazana ayithatha wayixuba kanye lenhlama enengi yefulawa yayikhukhumalisa.”

34 UJesu wakhuluma zonke lezi izinto exukwini labantu ngemizekeliso; kazange akhulume lutho kubo engasebenzisanga umzekeliso.

35 Ngakho kwagcwaliseka okwakhulunywa ngomphrofethi ukuthi: “Ngizavula umlomo wami ngemizekeliso, ngizakutsho izinto ezifihliweyo kulokhu kwadatshulwa umhlaba.”

Umzekeliso Wokhula Uyacasiswa

36 Wasesuka exukwini waya endlini. Abafundi bakhe beza kuye bathi, “Sichazele umzekeliso wokhula ensimini.”

37 Waphendula wathi, “Lowo owahlanyela inhlanyelo enhle yiNdodana yoMuntu. 38 Insimu yilizwe, njalo inhlanyelo enhle imele amadodana ombuso. Ukhula lungamadodana omubi, 39 njalo isitha esiluhlanyelayo nguSathane. Isivuno siyikuphela komhlaba, njalo abavuni yizingilosi.

40 “Njengalokhu ukhula lusitshunwa lutshiswe emlilweni, kuzakuba njalo ekupheleni komhlaba. 41 Indodana yoMuntu izathuma izingilosi zayo zicente konke okubanga isono embusweni wayo labo bonke abenza ububi.

42 Zizabaphosela esihogweni somlilo ongungumayo okuzakuba khona ukukhala lokugedla amazinyo. 43 Lapho-ke abalungileyo bazakhazimula njengelanga embusweni kaYise wabo. Lowo olezindlebe, kezwe.

Umzekeliso Wegugu Elifihliweyo Lowephareli

44 “Umbuso wezulu unjengegugu elifihliweyo esivandeni. Kwathi indoda isilitholile yalifihla njalo, kwathi ngoba iphakathi kokuthokoza yahamba yayathengisa konke eyayilakho yayathenga lesosivande.

45 “Njalo, umbuso wezulu ufana lomthengi edinga amaphareli amahle. 46 Kwathi esefumene elinye elalilentengo ephezulu wahamba wayathengisa konke ayelakho walithenga.

Umzekeliso Wombule

47 “Futhi, umbuso wezulu ufana lombule owehliselwa phansi echibini wahuquluza zonke izinhlobo zezinhlanzi. 48 Wathi usugcwele, abagoli bezinhlanzi bawudonsela okhunjini. Basebehlala phansi baqoqela ezitsheni zonke izinhlanzi ezilungileyo kodwa ezimbi bazilahla.

49 Lokhu yikho okuzakwenzakala ekupheleni komhlaba. Izingilosi zizakuza zehlukanise ababi kwabalungileyo 50 zibaphosele esihogweni somlilo ongungumayo, lapho okuzaba lokukhala lokugedla amazinyo.

51 “Selizizwisisile na zonke lezi izinto?” uJesu wababuza. Bathi, “Yebo.”

52 Wathi kubo, “Ngakho wonke umfundisi womthetho osethwasisiwe ngombuso wezulu unjengomnini wendlu okhupha esiphaleni sakhe amagugu amatsha lamadala.”

Umphrofethi Ongeladumo

53 UJesu eseqedile imizekeliso le wasuka lapho wahamba. 54 Wafika edolobheni lakibo waqalisa ukufundisa abantu esinagogeni labo, bamangala. Babuza bathi, “Indoda le yayithatha ngaphi inhlakanipho le lamandla la angummangaliso? 55 Kasindodana yombazi na? Ibizo likanina kasuMariya na, labafowabo kabasoJakhobe loJosefa loSimoni loJudasi na?

56 Odadewabo kabakho yini khonapha lathi? Pho indoda le yazizuza ngaphi izinto zonke lezi?” 57 Bakhubeka ngaye. Kodwa uJesu wathi kubo, “Lapho umphrofethi angeladumo khona kusedolobheni lakibo lasemzini wakhe.”

58 Njalo kenzanga imimangaliso eminengi khona ngenxa yokusilela kwabo ukukholwa.